Ва Уздзе агучылі прысуд 35-гадоваму жыхару раёна, які абвінавачваўся ў катаванні свайго 7-гадовага сына, паведамілі ў Генпракуратуры.
Дзіця абвінавачаны збіў летам мінулага года. Паводле заключэння экспертаў, мужчына нанёс хлопчыку не менш за 28 «траўмавальных уздзеянняў» рукамі па галаве, тулаве, руках і нагах, чым нанёс цялесныя пашкоджанні, «якія не пацягнулі за сабой кароткачасовага разладу здароўя або нязначнай страты працаздольнасці».
У судовым паседжанні абвінавачаны прызнаў віну ў поўным аб’ёме. Растлумачыў, што біў сына з «выхаваўчымі мэтамі».
Суд прызнаў мужчыну вінаватым і прызначыў паўтара года калоніі агульнага рэжыму. Яго таксама абавязалі прайсці прымусовае лячэнне ад алкагалізму.
Прысуд не ўступіў у законную сілу і можа быць абскарджаны.