Названая самая прыязная краіна свету для экспатаў — яна знаходзіцца ў цэнтральнаамерыканскім рэгіёне. Такі вынік быў атрыманы падчас апытання, праведзенага InterNations, гідам для экспатаў, які спытаў замежных жыхароў у 53 краінах свету пра іх жыццё ў новай краіне, піша Daily Mail.
Экспатаў пыталі пра сацыяльнае жыццё, пра тое, ці адчуваюць яны сябе як дома, наколькі лёгка ім было прывыкнуць да мясцовай культуры, а таксама пра прыязнасць мясцовага насельніцтва.
Дык якія ж краіны найлепшыя для пераезду?
Самыя прыязныя краіны
Коста-Рыка
Коста-Рыка займае першае месца ў рэйтынгу самых прыязных краін свету для экспатаў.
Большасць замежнікаў (88%) адчувае сябе тут «вельмі жаданымі гасцямі», а 83% кажуць, што адчуваюць сябе як дома. Больш чым траціна (35%) лічыць, што адаптацыя да мясцовай культуры праходзіць вельмі лёгка, у той час як у сярэднім па свеце гэты паказчык складае ўсяго 21%.
«Мясцовыя жыхары — у цэлым далікатныя, мілыя людзі. Вы вучыцеся адаптавацца да філасофіі жыцця „Pura Vida“ ў Коста-Рыцы», — расказаў канадзец, які жыве ў гэтай краіне.
Дзевяць з дзесяці экспатаў лічаць, што мясцовыя жыхары прыязныя, а 58% адзначаюць, што завесці мясцовых сяброў тут лёгка.
Мексіка
Мексіка займае другое месца ў рэйтынгу і атрымлівае найвышэйшыя адзнакі за гасціннасць.
Амаль 75% (73%) экспатаў задаволеныя сваім сацыяльным жыццём у Мексіцы, а 85% адчуваюць сябе тут жаданымі гасцямі. На думку 67% апытаных, знаходзіць сяброў сярод мясцовых лёгка, а 31% экспатаў заявілі, што большасць іх сяброў — мексіканцы (у параўнанні са сярэднесусветным паказчыкам у 17%).
«Сацыяльныя сувязі тут вельмі важныя, таму мясцовыя з радасцю заводзяць новых сяброў, у тым ліку сярод экспатаў», — расказаў амерыканец InterNations.
Філіпіны
На трэцім месцы ў спісе — Філіпіны.
Каля 41% экспатаў заявіла, што іх асноўныя сябры — мясцовыя жыхары. Амаль 70% (69%) экспатаў лічаць, што завесці мясцовых сяброў лёгка, а 68% задаволеныя сваім сацыяльнай жыццём у гэтай паўднёва-ўсходнеазіяцкай краіне.
85% адчуваюць сябе тут жаданымі гасцямі, а 78% кажуць, што адчуваюць сябе як дома.
«Мне падабаецца свабодны і нязмушаны лад жыцця. Тут усе гатовыя пабалбатаць», — лічыць брытанец, які жыве ў гэтай краіне.
Найменш прыязныя краіны
Кувейт
Кувейт заняў апошняе месца ў рэйтынгу.
Толькі чвэрць экспатаў (26%) адчувае сябе тут жаданымі, а палова (49%) прызнаецца, што не адчувае сябе як дома. Амаль палова (47%) апытаных заявіла, што адаптацыя да мясцовай культуры даецца ім цяжка, а ўсяго 22% задаволеныя сваім сацыяльным жыццём у краіне.
Больш чым палова (53%) экспатаў прызнаюцца, што маюць зносіны толькі з іншымі замежнікамі. Гэта можа быць звязана з тым, што 61% экспатаў сцвярджае, што пасябраваць з мясцовымі жыхарамі ў Кувейце вельмі складана.
Нарвегія
Нарвегія заняла перадапошняе месца ў рэйтынгу.
67% экспатаў маюць цяжкасці з пошукам мясцовых сяброў, а 49% незадаволеныя сваім сацыяльным жыццём. Менш чым палова (49%) адчувае сябе як дома, а 40% лічаць мясцовых жыхароў непрыязнымі.
Экспаты таксама з цяжкасцю прывыкаюць да мясцовай культуры, і веданне мовы не дапамагае.
«Якой бы добрай ні была мая нарвежская, я ўсё роўна не магу завесці сяброў сярод нарвежцаў», — падзяліўся кенійскі экспат з InterNations.
Германія
Германія таксама трапіла ў спіс найменш прыязных краін, заняўшы трэцяе месца з канца.
32% экспатаў не адчуваюць сябе тут жаданымі гасцямі. 39% лічаць мясцовых жыхароў прыязнымі, а 65% маюць цяжкасці з тым, каб завесці сяброў сярод немцаў.
«З немцамі складана пасябраваць, бо ў іх ужо ёсць сфармаванае кола зносін з дзіцячага садка ці школы», — расказаў чэшскі экспат.
Самыя прыязныя краіны для экспатаў
- Коста-Рыка
- Мексіка
- Філіпіны
- Інданезія
- Бразілія
- Тайланд
- Панама
- Калумбія
- Кенія
- Грэцыя
- Іспанія
- Аман
- В’етнам
- Егіпет
- Партугалія
- ААЭ
- Кіпр
- Бахрэйн
- Кітай
- Аўстралія
- Новая Зеландыя
- Катар
- Паўднёвая Афрыка
- Малайзія
- Саудаўская Аравія
- Індыя
- Ганконг
- ЗША
- Ірландыя
- Сінгапур
- Бельгія
- Мальта
- Італія
- Францыя
- Японія
- Паўднёвая Карэя
- Польшча
- Люксембург
- Канада
- Турцыя
- Нідэрланды
- Вялікабрытанія
- Чылі
- Венгрыя
- Данія
- Швейцарыя
- Чэхія
- Швецыя
- Аўстрыя
- Фінляндыя
- Германія
- Нарвегія
- Кувейт.