У беларускіх крамах зноў прадаюць вядомы нямецкі шакалад Ritter Sport, хоць яго ўвоз забаронены пасля ўведзенага летась эмбарга. Расказваем, як стаў магчымым такі імпарт і хто ўвозіць гэты шакалад.
Як у Беларусі з’явіўся забаронены шакалад
Паводле паведамленняў медыя, у беларускіх крамах зноў пачалі прадаваць папулярны шакалад Ritter Sport, выраблены ў Германіі.
Пры гэтым шакалад і прадукцыя з яго ў знешнім гандлі ЕАЭС праходзіць пад кодам 1806. Гэты код уключаны ў спіс эмбарга, уведзенага беларускімі ўладамі ў пачатку мінулага года як адказ на «дыскрымінацыйную палітыку і ажыццяўленне недружалюбных дзеянняў». Абмежаванні падаўжалі, чарговы раз — да канца чэрвеня 2023 года. Гэта значыць, што такую прадукцыю, выпушчаную ў краінах, якія беларускія ўлады лічаць недружалюбнымі, забаронена ўвозіць у Беларусь. Відавочна, у спісе краін знаходзіцца і Германія.
Як у такім выпадку стаў магчымым імпарт шакаладу з нямецкай фабрыкі? Рэч у тым, што, нягледзячы на забарону ўвозу цэлага спісу прадуктаў з «недружалюбных» краін, імпартаваць іх можна (як бы дзіўна гэта ні гучала), але толькі па спецыяльных квотах, вызначаных дзяржорганамі. У выпадку з шакаладам такія квоты выдае Міністэрства антыманапольнага рэгулявання і гандлю. То-бок гэтая структура вырашае, хто і ў якіх колькасцях будзе ўвозіць у нашую краіну такія прадукты.
З іншага боку, у Беларусі легалізавалі паралельны імпарт. Гэта азначае, што ў нашую краіну можна імпартаваць прадукцыю без ведама праваўладальніка. Гэты дакумент не адмяняе эмбарга, якім уведзеная не проста забарона ўвозу з «недружалюбных» краін, а і ўвоз на тэрыторыю Беларусі і рэалізацыя на ўнутраным рынку тавараў, якія паходзяць з іх. Але сам факт легалізацыі паралельнага імпарту павялічвае рызыкі трапляння ў нашую краіну многіх тавараў па шэрых схемах.
Хто займаецца імпартам нямецкага шакаладу
Ritter Sport у Беларусь цяпер імпартуе «Логистическая компания Восток», паведамляе Realt.by. Раней гэтым займалася фірма «Альфа Дистрибьюция». Мяркуючы па ўсім, МАРГ выдаў квоты першай з іх, а другая, як і многія іншыя імпарцёры, не атрымала права ўвозіць у Беларусь гэты шакалад (як і іншыя прадукты).
Мяркуючы з інфармацыі на старонцы ў LinkedIn, з траўня 2021 года «Логистической компанией Восток» кіраваў Дзмітрый Шчасны (не выключана, што ён там працуе дагэтуль), паралельна ён з’яўляецца намеснікам дырэктара па развіцці «БелГлобалГарант». Па стане на 23 студзеня, старонка была недаступная, але ў пошуку ў Google гэтая інфармацыя ўсё яшчэ ёсць.
Кампанія «БелГлобалГарант» належыць Сяргею Цяцерыну, акрамя іншага яна займаецца оптавым гандлем прадуктаў харчавання. Гэтага бізнесоўца звязвае цеснае сяброўства з Аляксандрам Лукашэнкам.
Паводле інфармацыі тэлеграм-канала «МотолькоПомоги», раней Дзмітрый Шчасны працаваў на МТЗ. Як мы праверылі, чалавек з такімі ж імем і прозвішчам выступаў на тэлебачанні як намеснік дырэктара маркетынг-цэнтра па працы на рынках далёкага замежжа МТЗ, яго імя неаднаразова згадвалася ў публікацыях завода.
