Санкцыі ў дачыненні да былога прэм’ер-міністра Беларусі Сяргея Румаса ўведзеныя на 10 гадоў. Прэзідэнт Украіны Уладзімір Зяленскі падпісаў адпаведны ўказ 19 лютага.
У новым украінскім санкцыйным спісе — 332 расіяніны, Сяргей Румас і Маскоўская біржа.
Сяргей Румас ідзе ў пераліку пад 166-м нумарам. Санкцыі ўключаюць у сябе сярод іншага блакаванне актываў, поўнае спыненне гандлёвых аперацый, забарону на вывад капіталаў з Украіны, пазбаўленне дзяржаўных узнагародаў Украіны і забарону на ўдзел у прыватызацыі і набыццё ва ўласнасць зямельных участкаў.
З якой прычыны Сяргей Румас трапіў у санкцыйны спіс Украіны, не паведамляецца. Экс-прэм'ер Беларусі не выказваўся ў падтрымку ваеннай агрэсіі РФ супраць Украіны ў СМІ або сацсетках.
Сяргей Румас стаў прэм’ер-міністрам Беларусі 18 жніўня 2018 года, змяніўшы на пасадзе Андрэя Кабякова. За два месяцы да выбараў прэзідэнта Беларусі, 3 чэрвеня 2020 года, Аляксандр Лукашэнка адправіў урад Румаса ў адстаўку. У 2021-м Румас стаў чальцом назіральнай рады «Рассельгасбанка».