У Мінску ўводзяць адзіны праязны на ўсе віды грамадскага транспарту, уключаючы метро. Кошт месячнага дакумента, як раней і пісала «Люстэрка», — 51,05 рубля. Рашэнне Мінгарвыканкама ўступіць у сілу з 16 жніўня. Відаць, з гэтай даты новы праязны з’явіцца ў продажы.
Кошт адзінага праязнога выгаднейшы, чым цэннік на цяперашні аналаг на чатыры віды транспарту — аўтобус, трамвай, тралейбус і метро (бонусам — экспрэс-аўтобус). Такі праязны цяпер каштуе 69,86 рубля за месяц. Кошт жа адзінага праязнога на месяц — 51,05 рубля.
Адзіны праязны на 10 дзён будзе каштаваць 17,93 рубля, на 15 дзён — 26,89 рубля,
У лютым гэтага года ў Мінгарвыканкаме заяўлялі, што адзіны праязны на ўсе віды грамадскага транспарту можа з’явіцца ўжо ў другім паўгоддзі 2023 года. «У выніку пасажыры будуць адчуваць сябе свабоднымі ў выбары канкрэтнага віду транспарту і маршруту руху, а таксама сэканомяць на куплі некалькіх відаў праязных», — казала першая намесніца старшыні Мінгарвыканкама Надзея Лазарэвіч.
У пачатку жніўня намеснік гендырэктара «Мінсктранса» Віктар Тозік паведаміў дату ўвядзення адзінага праязнога: «Да 1 верасня плануецца ўкараненне адзінага праязнога дакумента. Калі сёння пры цяперашнім пераліку праязных дакументаў, якіх налічваецца 180 відаў, з укараненнем вось гэтага адзінага праязнога іх застанецца 26».
Нагадаем, з 6 ліпеня павысілі тарыфы на праезд у пасажырскіх цягніках, у тым ліку на гарадскіх лініях. Услед за гэтым вырас кошт і сумешчаных праязных на грамадскі транспарт — бескантактных смарт-карт. Акрамя аўтобуса, тралейбуса, трамвая і метро імі можна скарыстацца ў цягніках гарадскіх ліній.