Беларусь не страчвае кантактаў з Еўрапейскім саюзам, заявіў Аляксандр Лукашэнка 22 ліпеня на нарадзе па сітуацыі ў прамысловасці. Ён таксама заявіў, што «ЕС — гэта нашыя суседзі, з імі трэба знайсці шляхі супрацоўніцтва». Пры гэтым раней палітык неаднаразова выступаў з крытыкай у адрас суседніх краін ЕС. Чым абумоўленая цяперашняя рыторыка Аляксандра Лукашэнкі? На гэтае пытанне адказаў старшы навуковы супрацоўнік BEROC Анатоль Харытончык падчас брыфінгу па сітуацыі ў эканоміцы Беларусі.
Каротка пра тое, што адбылося
Беларусь развівае адносіны з дружалюбнымі краінамі і не страчвае кантактаў з Еўрапейскім саюзам, заявіў Аляксандр Лукашэнка 22 ліпеня на нарадзе па сітуацыі ў прамысловасці. «Гэта нашыя суседзі — Еўрапейскі саюз. З імі трэба знайсці шляхі супрацоўніцтва», — удакладніў палітык. Нагадаем, у канцы чэрвеня ЕС увёў новыя санкцыі супраць нашай краіны, яны закранулі ў тым ліку некаторую мэблю, трактары, кабельную прадукцыю. Гэтыя айчынныя тавары трапілі пад абмежаванні на пастаўку ў Еўрасаюз.
Пры гэтым ЕС таксама ўвёў істотныя абмежаванні па пастаўках прамысловых і харчовых тавараў у Беларусь.
Эксперт пра тое, чаму чыноўнікі памянялі рыторыку адносна ЕС
— Мабыць, тут больш пытанне ў палітычна-эканамічнай плоскасці. Цяпер мы (эканоміка Беларусі. — Заўв. рэд.) моцна завязаныя на Расію — каля 60% экспарту ідзе ў гэтую краіну, крыху менш імпарту адтуль ідзе. Плюс транспартная інфраструктура, турыстычная ўся завязаная на Расію, — адзначыў Анатоль Харытончык. — Але такая сітуацыя досыць небяспечная ў доўгатэрміновай перспектыве, таму, вядома, было б добра спрабаваць нейкім чынам дыверсіфікаваць гандлёвыя патокі. Я думаю, менавіта таму робяцца такія заявы.
Што да канкрэтна апошняга пакета санкцый ЕС супраць Беларусі, то эксперт адзначыў:
— Мяркуючы з таго, што ў ім (якія абмежаванні. — Заўв. рэд.), думаю, яго эфекты будуць звязаныя з тым, што бізнес, людзі і дзяржава будуць далей адаптавацца да новых умоваў і будуць знаходзіцца, фармаваць новыя ланцужкі паставак. Дапусцім, калі раней было два пасярэднікі (для пастаўкі санкцыйнага тавару. — Заўв. рэд.), то стане пяць. Было пяць, а стане сем.
На думку эксперта, гэта з вялікай імавернасцю адаб’ецца на цане гэтых тавараў.
«Таму пажадана неяк дыверсіфікаваць усе гэтыя гандлёвыя патокі», — дадаў аналітык.
Чытайце таксама
