Аляксандр Лукашэнка гатовы «хоць заўтра нармалізаваць» адносіны з Польшчай і не вядзе агрэсіўнай палітыкі ў дачыненні да гэтай краіны, а вось у Варшаве нібыта «пакутуюць на амбіцыі» што да вяртання Заходняй Беларусі. Такія выказванні палітык зрабіў 12 верасня на сустрэчы з прадстаўнікамі розных нацыянальнасцяў, якія жывуць у Беларусі, перадае яго прэс-служба.
Лукашэнка ўпэўнены, што «99% палякаў» разумеюць і падтрымліваюць палітыку Беларусі, якая не агрэсіўная ў дачыненні да Польшчы.
— Мы не стараемся навязаць сваю палітыку, не стараемся ваяваць з Польшчай. Мы выдатна разумеем, што ў гэтай вайне загінуць мільёны і ніхто не выйграе. І яна нам не патрэбная. Нам патрэбныя мір і спакой, — сказаў ён.
Палітык запэўніў, што беларусам ад палякаў «нічога не трэба», а вось палякам нібыта «трэба зноў Заходнюю Беларусь, Заходнюю Украіну туды (у склад Польшчы. — Заўв. рэд.)».
— Нехта яшчэ вось на гэтыя амбіцыі пакутуе, — абурыўся ён.
Лукашэнка заявіў, што «скарыць Беларусь нікому не ўдасца», бо «ў нас дастаткова сяброў, ды і мы не лыкам шытыя». Ён дадаў, што Мінск гатовы «хоць заўтра нармалізаваць» адносіны з Варшавай, аднак апошняя робіць крокі, якія «зусім не скіраваныя на ўрэгуляванне адносін».
— Навошта закрылі памежныя пераходы [на польска-беларускай мяжы]? Бо там па жывым мяжа праходзіла. На магілу нельга трапіць, — паскардзіўся палітык.
Ён адхіліў прэтэнзіі Польшчы наконт патоку мігрантаў з Беларусі, наяўнасці ў нашай краіне палітвязняў і парушэнняў правоў чалавека. А таксама заявіў, што быў згодны на абмен палітвязня Андрэя Пачобута, але ў Варшаве нібыта гэтага не хацелі.
— Добра, забірайце. А ён (Пачобут. — Заўв. рэд.) кажа: «Я туды не паеду, мне не трэба». А яны і не хочуць яго забіраць. Проста гэта стала палітычнай разменнай манетай, — пракаментаваў Лукашэнка.
Нагадаем, у канцы жніўня польскі прэзідэнт Анджэй Дуда заявіў, што польскі бок сапраўды абмяркоўваў магчымасць вызвалення палітвязня журналіста Андрэя Пачобута ў рамках расійска-амерыканскага абмену.
— Часу на перамовы не было. Калі б абмен заблакавалі і высветлілася, што гэта было супраць волі Андрэя Пачобута, у нас узнікла б вельмі сур’ёзная праблема, — прызнаўся Дуда.
Раней былы міністр унутраных справаў Польшчы Марыюш Каміньскі ў інтэрв'ю Republika Television сказаў, што галоўнай негалоснай умовай, якую Варшава атрымала ад Мінска ў перамовах па вызваленні палітвязня Андрэя Пачобута, была выдача экс-чыноўніка, а цяпер аднаго з лідараў дэмакратычных сіл Беларусі за мяжой Паўла Латушкі.
У сакавіку мінулага года Аляксандр Лукашэнка заявіў, што гатовы абмяняць Пачобута на Паўла Латушку і ўсю каманду НАУ.
Між тым прапагандыст Юрый Васкрасенскі нядаўна заявіў, што Варшаве нібыта прапаноўвалі выпусціць з беларускай калоніі палітвязня журналіста Андрэя Пачобута, але з умовай, што забіраць яго з-за кратаў прыедзе асабіста міністр замежных справаў нашай заходняй суседкі Радаслаў Сікорскі.
У польскім МЗС адказалі, што гэтая прапанова «не ўпісваецца ні ў адзін канон двухбаковых адносін».