Дзяржаўны дэпартамент ЗША 18 снежня перагледзеў рэкамендацыі для грамадзян, якія плануюць паездкі ў Беларусь. Рызыку пакінулі на чацвёртым узроўні — «не наведваць».
На сайце Дзярждэпа падкрэсліваецца, што грамадзянам ЗША варта ўстрымацца ад паездак у Беларусь. Тым, хто ўжо знаходзіцца ў краіне, настойліва рэкамендуецца пакінуць яе як мага хутчэй.
Ведамства папярэджвае, што грамадзянам ЗША, якія знаходзяцца ў Беларусі, важна ўнікаць масавых мерапрыемстваў і дэманстрацый, перагледзець пытанне правозу электронных прыладаў і выходзіць з сацыяльных сетак. Таксама рэкамендавана скласці план дзеянняў на выпадак непрадбачаных абставінаў і зарэгістравацца ў сістэме STEP для аператыўнага атрымання паведамленняў і сувязі ў экстраннай сітуацыі.
Асноўнымі рызыкамі называюць адвольнае затрыманне, кепскія ўмовы ў зняволенні і магчымасць закрыцця памежных пераходаў без папярэджання. Акрамя таго, амерыканскія ўлады згадваюць «падтрымку Беларуссю вайны Расіі супраць Украіны».
У Вашынгтоне таксама нагадалі, што ў выпадку затрымання грамадзян ЗША ў Беларусі дапамога з боку амерыканскіх уладаў можа быць моцна абмежаваная.
Нагадаем, праца амерыканскай амбасады ў Мінску была прыпыненая 28 лютага 2022 года. Дзярждэпартамэнт распарадзіўся эвакуяваць супрацоўнікаў і спыніць консульскія паслугі, у тым ліку экстранныя. Цяпер грамадзянам ЗША, якія маюць патрэбу ў дапамозе, прапануецца звяртацца ў амбасады і консульствы ЗША ў суседніх краінах. Амерыканцам таксама раілі пакінуць Беларусь. Аналагічныя рэкамендацыі далі грамадзянам ЗША і ў жніўні мінулага года.