Беларуска напісала ў ДАІ скаргу на кіроўцу, сцвярджаючы, што ў маршрутцы, у якой яна ехала, не было рамянёў бяспекі. У інспекцыі правялі праверку і прыцягнулі да адказнасці аўтарку звароту. Падрабязнасці гісторыі расказала прэс-служба Міжрэгіянальнай асацыяцыі перавозчыкаў (МАП).
Інцыдэнт адбыўся некалькі месяцаў таму. У ДАІ аднаго з абласных цэнтраў паступіла скарга ад пасажыркі міжгародняй маршруткі. Жанчына расказала, што кіроўца буса нібыта парушаў ПДР.
«Канфлікт узнік праз рамяні бяспекі. Перад адпраўленнем кіроўца нагадвае пра неабходнасць прышпіліцца, але не ўсе пасажыры рэагуюць на гэтыя просьбы адэкватна. Часам узнікаюць скандалы», — патлумачыў МАП перавозчык.
У скарзе, адпраўленай у ДАІ, жанчына адзначыла, што маршрутка не адпавядала патрабаванням бяспекі. Яна напісала, што ў аўтобусе зусім не было рамянёў бяспекі. Таму ёй давялося падвяргаць сваё жыццё небяспецы, бо ўсю дарогу яна ехала непрышпіленай.
У ДАІ правялі праверку. Перавозчык паказаў інспектарам аўтобус, на які і паступіла скарга. Інфармацыя са звароту не пацвердзілася. Усе рамяні былі ў парадку, больш за тое, на кожным сядзенні размешчаныя налепкі, якія нагадваюць пра неабходнасць прышпіліцца.
«Але на гэтым гісторыя не скончылася. Пасажырка выразна напісала, што ехала непрышпіленай, а значыць, парушыла патрабаванні правілаў. Як паведамілі перавозчыку, менавіта жанчыну прыцягнулі да адказнасці за паездку без рамяня», — сказалі ў МАП.