У Міністэрстве абароны Расіі заявілі, што на востраве ў вусці Дняпра знішчылі тры ўкраінскія дыверсійныя групы. У Генштабе УСУ паведамілі, што на поўдзень ад Бахмута выцясняюць праціўніка з займаных пазіцый і замацоўваюцца на дасягнутых рубяжах. Расказваем, пра што яшчэ гаворыцца ў зводках штабоў і справаздачах экспертаў на 561-ы дзень вайны ва Украіне.
Генштаб УСУ: Працягваем наступальную аперацыю на Мелітопальскім напрамку
За мінулыя суткі адбылося 39 баявых сутыкненняў з праціўнікам. Расійская армія нанесла 10 ракетных і 69 авіяцыйных удараў, правяла 51 абстрэл з рэактыўных сістэм залпавага агню па пазіцыях УСУ і ўкраінскіх населеных пунктах, паведаміў Генштаб УСУ.
— На Северскім і Слабажанскім напрамках армія РФ нанесла авіяцыйны ўдар у раёне вёскі Гранаў Харкаўскай вобласці. Артылерыйскім і мінамётным абстрэлам падвергліся больш чым 25 населеных пунктаў.
— На Купянскім напрамку праціўнік нанёс авіяцыйныя ўдары ў раёнах Сінькоўкі, Катляроўкі, Крахмальнага. Артылерыйскім і мінамётным абстрэлам падвергліся чатыры населеныя пункты Харкаўскай вобласці.
— На Ліманскім напрамку Сілы абароны адбілі атакі расійскіх войскаў у раёне Новаягораўкі Луганскай вобласці. Праціўнік нанёс авіяцыйныя ўдары ў раёнах Дружалюбаўкі Харкаўскай вобласці, Белагораўкі Луганскай вобласці, Ямпалоўкі, Вясёлага Данецкай вобласці. Артылерыйскім і мінамётным абстрэлам падвергліся больш чым 10 населеных пунктаў.
— На Бахмуцкім напрамку УСУ адбілі атакі праціўніка каля Арэхава-Васільеўкі Данецкай вобласці. Расіяне нанеслі авіяўдары паблізу Хромавага, Іванаўскага, Кляшчэеўкі, Паўночнага, абстралялі больш чым 20 населеных пунктаў Данецкай вобласці.
У той жа час у выніку штурмавых дзеянняў Сілы абароны маюць частковы поспех на поўдзень ад Бахмута, выцясняюць праціўніка з займаных пазіцый і замацоўваюцца на дасягнутых рубяжах.
— На Аўдзееўскім напрамку Сілы абароны адбілі атакі расійскіх войскаў у раёне Аўдзееўкі. Праціўнік нанёс авіяцыйны ўдар па гэтым населеным пункце і абстраляў яшчэ больш чым 15 у Данецкай вобласці.
— На Мар'інскім напрамку Сілы абароны працягваюць стрымліваць наступ расійскіх войскаў у раёне Мар'інкі. Армія РФ нанесла авіяцыйны ўдар ля Краснагораўкі. Артылерыйскім і мінамётным абстрэлам падвергліся чатыры населеныя пункты Данецкай вобласці.
— На Шахцёрскім напрамку праціўнік нанёс авіяцыйныя ўдары ў раёнах Новаўкраінкі, Залатой Нівы, Ураджайнага, абстраляў з мінамётаў і артылерыі больш чым 15 населеных пунктаў Данецкай вобласці.
— На Запарожскім напрамку праціўнік нанёс авіяцыйныя ўдары ў раёнах Малой Такмачкі і Рабоціна Запарожскай вобласці. Артылерыйскім і мінамётным абстрэлам падвергліся больш чым 15 населеных пунктаў.
— На Херсонскім напрамку расійскія войскі нанеслі авіяцыйны ўдар непадалёк Альгоўкі. Артылерыйскім і мінамётным абстрэлам падвергліся тры населеныя пункты Херсонскай вобласці.
У той жа час Сілы абароны Украіны працягваюць наступальную аперацыю на Мелітопальскім напрамку, знішчаюць праціўніка і вызваляюць акупаваныя тэрыторыі.
— Авіяцыя Сіл абароны нанесла 18 удараў па раёнах канцэнтрацыі асабовага складу, узбраення і ваеннай тэхнікі і па пазіцыях зенітна-ракетных комплексаў праціўніка.
— Падраздзяленні ракетных войскаў і артылерыі пабілі чатыры склады боепрыпасаў, 12 артылерыйскіх сродкаў, два пункты кіравання, зенітна-ракетны комплекс, станцыю радыёэлектроннай барацьбы, два раёны канцэнтрацыі асабовага складу, узбраення і ваеннай тэхнікі расійскіх войскаў.
Мінабароны Расіі: Перахапілі 11 рэактыўных снарадаў HIMARS і кіравальную авіябомбу JDAM
— На Запарожскім напрамку падраздзяленні расійскай групоўкі войскаў, авіяцыя і артылерыя адбілі 14 атак УСУ ў раёнах населеных пунктаў Вербавае і Рабоціна Запарожскай вобласці.
— На Данецкім напрамку падраздзяленні Паўднёвай групоўкі войскаў ва ўзаемадзеянні з авіяцыяй і артылерыяй адбілі дзевяць атак штурмавых груп УСУ ў раёнах населеных пунктаў Кляшчэеўка, Андрэеўка і Хімік Данецкай вобласці.
— На Купянскім напрамку падраздзяленні Заходняй групоўкі войскаў пры падтрымцы авіяцыі і артылерыі за дзень адбілі чатыры атакі 95-й дэсантна-штурмавой брыгады УСУ і нанеслі агнявое паражэнне праціўніку ў раёне населенага пункта Кіслоўка Харкаўскай вобласці.
— На Чырвоналіманскім напрамку падраздзяленні групоўкі войскаў «Цэнтр «пры падтрымцы авіяцыі і артылерыі адбілі атаку штурмавых груп 67-й механізаванай брыгады УСУ ў раёне населенага пункта Чырвоная Дзіброва Луганскай вобласці.
— На Паўднёва-Данецкім напрамку падраздзяленні групоўкі войскаў «Усход» ва ўзаемадзеянні з авіяцыяй і артылерыяй нанеслі агнявое паражэнне падраздзяленням УСУ ў раёне населенага пункта Старамаёрскае Данецкай вобласці.
Акрамя таго, у раёне населенага пункта Новамаёрскае адбітая атака УСУ, а таксама спыненая дзейнасць дзвюх дыверсійна-разведвальных груп.
— На Херсонскім напрамку нанесенае агнявое паражэнне жывой сіле і тэхніцы УСУ. Акрамя таго, на востраве Пераяслаўскі знішчаныя тры ўкраінскія дыверсійна-разведвальныя групы са складу 126-й брыгады тэрытарыяльнай абароны.
Усяго за суткі, паводле МА РФ, авіяцыяй, ракетнымі войскамі і артылерыяй нанесенае паражэнне жывой сіле і ваеннай тэхніцы УСУ ў 117 раёнах. У раёне населенага пункта Любімаўка Запарожскай вобласці знішчаная пускавая ўстаноўка зенітнага ракетнага комплексу С-300ПС.
У раёнах населеных пунктаў Краснае і Новаміхайлаўка Данецкай вобласці знішчаныя палявыя склады боепрыпасаў 3-й штурмавой і 79-й дэсантна-штурмавой брыгад УСУ.
Сродкамі СПА перахопленыя 11 рэактыўных снарадаў сістэмы залпавага агню HIMARS, а таксама кіравальная авіябомба JDAM. Акрамя таго, знішчаны 41 украінскі беспілотны лётны апарат.
Інстытут па вывучэнні вайны: Апальных расійскіх генералаў перапрызначаюць на другарадныя пасады
Па стане на 6 верасня ўкраінскія сілы працягнулі контрнаступленне на Бахмуцкім напрамку і на захадзе Запарожскай вобласці, дзе дамагліся поспехаў на кірунку Рабоціна — Новапракопаўка.
Украінскія і расійскія крыніцы паведамляюць, што расійская абаронная прамысловасць сутыкаецца з усё большымі праблемамі што да забяспечання патрэбаў арміі — у дадатак да ўжо вядомых праблем РФ з аднаўленнем запасаў высокадакладнай зброі. Прадстаўнік Галоўнай ваеннай разведкі Украіны (ГУР) Андрэй Юсаў паведаміў 6 верасня, што Расія можа вырабляць толькі «дзясяткі» крылатых ракет «Калібр» і меншую колькасць ракет «Іскандэр» за месяц, што не дазволіць Расіі давесці свае запасы да ўзроўню 2022 года. Юсаў паведаміў, што Расія мае цяжкасці з набыццём сучаснага аптычнага абсталявання, электронікі, чыпаў і схем і што «шэры імпарт» і кантрабанда не могуць цалкам пакрыць наяўныя патрэбы. Расійскія крыніцы дадаткова адзначаюць, што расійская прамысловасць не можа вырабляць дастаткова гумы для замены зношаных шын ваеннай тэхнікі, жыццёва важнай для аперацый на перадавой, асабліва ў брудных, дажджлівых і галалёдных умовах. Яны сцвярджаюць, што расійскія ўлады абяцалі знайсці рашэнне праблемы з шынамі да сярэдзіны жніўня, але па стане на 5 верасня сітуацыя не змянілася. Нізкая якасць і недастатковая колькасць шын будуць усё больш абмяжоўваць мабільнасць расіян у брудную пару года і зімой, адзначаюць у ISW.
У Расіі працягваюць разважаць пра цяперашнюю ролю і будучыню звольненага звязанага з ПВК Вагнера генерала арміі Сяргея Суравікіна, былога камандуючага Паветрана-касмічнымі сіламі (ПКС) Расіі. Некалькі расійскіх інсайдарскіх крыніц і ваенных блогераў адзначылі, што Міністэрства абароны Расіі выдаліла профіль Суравікіна са свайго афіцыйнага сайта, за выключэннем яго відэазвароту, апублікаванага падчас мяцяжу вагнераўцаў, з заклікам сысці.
Некаторыя расійскія інсайдарскія крыніцы таксама сцвярджаюць, што Суравікін заняў новую пасаду ў Садружнасці Незалежных Дзяржаваў. Эксперты і раней назіралі тэндэнцыю, калі расійскіх генералаў, якія не змаглі праявіць сябе ва Украіне (напрыклад, былы камандуючы Усходняй вайсковай акругай Аляксандр Чайко і былы камандуючы Паветрана-дэсантнымі войскамі Андрэй Сердзюкоў), у якасці пакарання адпраўлялі на перыферыю, у такія месцы, як Сірыя. Прызначэнне Суравікіна на другарадную пасаду ў структуры СНД можа значыць, што расійскае вайсковае кіраўніцтва працягвае практыку пераводу апальных ці неэфектыўных камандзіраў на пасады, не звязаныя з вайной ва Украіне, кажуць аналітыкі.
На што яшчэ звярнулі ўвагу эксперты:
- расійскія войскі 6 верасня вялі наступальныя дзеянні на рубяжы Купянск — Сватава — Крамянная, у раёне Бахмута, на рубяжы Аўдзееўка — Данецк, на захадзе Запарожскай вобласці і прасунуліся на асобных участках;
- расійскія ўлады працягваюць праводзіць прыхаваную мабілізацыю на фоне чутак пра новую хвалю ўсеагульнай мабілізацыі;
- украінскі бок паведамляе, што расейскія акупацыйныя ўлады працягваюць спробы ўзмацніць сацыяльны кантроль на акупаваных тэрыторыях, прыбіраючы са школьнай праграмы праўкраінскія матэрыялы.
